ಬಹುನಿರೀಕ್ಷಿತ ವಿಕ್ರಾಂತ್ ರೋಣ ರಿಲೀಸ್ ಡೇಟ್ ಫಿಕ್ಸ್

ಇತ್ತೀಚೆಗೆ ಕನ್ನಡ ಸಿನೆಮಾಗಳ ಗುಣಮಟ್ಟ ಯಾವ ರೀತಿ ಇದೆ ಅಂದ್ರೆ, ವಿಶ್ವವೇ ತಿರುಗಿ ನೋಡುವಂತಿದೆ. ಅದರಲ್ಲೂ ಕೆಜಿಎಫ್ ಬಂದ ನಂತರ ಕನ್ನಡ ಸಿನೆಮಾಗಳ ದಾರೀನೆ ಬದಲಾಗಿದೆ. ಕಳೆದ ತಿಂಗಳು ಬುರ್ಜ್ ಖಲೀಫಾ ಮೇಲೆ ತನ್ನ ಟೀಸರ್ ರಿಲೀಸ್ ಮಾಡಿ ವಿಶ್ವದಾದ್ಯಂತ ಹೆಸ್ರು ಮಾಡಿದ್ದ ವಿಕ್ರಾಂತ್ ರೋಣ ತಂಡ ಇದೀಗ ಬಿಡುಗಡೆ ದಿನಾಂಕ ಅನೌನ್ಸ್ ಮಾಡಿದೆ. ಆಗಸ್ಟ್ 19ಕ್ಕೆ ವಿಶ್ವದ ಹಲವಾರು ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ.

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅಭಿನಯದ ಬಹುನಿರೀಕ್ಷಿತ ಸಿನಿಮಾ ವಿಕ್ರಾಂತ್ ರೋಣ ಕನ್ನಡ ಚಿತ್ರರಂಗದಲ್ಲಿ ಮೈಲಿಗಲ್ಲು ಆಗುವ ಎಲ್ಲಾ ಲಕ್ಷಣ ಎದ್ದು ಕಾಣುತ್ತಿದೆ. ಅನೂಪ್ ಬಂಡಾರಿ ಆಕ್ಷನ್ ಕಟ್ ಹೇಳಿರುವ ಈ ಸಿನೆಮಾ ಬಹಳಷ್ಟು ಕಾರಣಗಳಿಗೆ ಚರ್ಚೆಯಾಗುತಿದ್ದು, ಕೋವಿಡ್ ನಂತರ ಶೂಟಿಂಗ್ ತೆರಳಿದ ಮೊದಲ ಸಿನಿಮಾ ಇದಾಗಿತ್ತು.

ಕಿಚ್ಚ ಚಿತ್ರರಂಗದಲ್ಲಿ 25 ವರ್ಷ ಪೂರೈಸಿರುವ ಹಿನ್ನೆಲೆಯಲ್ಲಿ ಈ ಸಿನೆಮಾ ಅವರ ವೃತ್ತಜೀವನದಲ್ಲಿ ಬಹುದೊಡ್ಡ ಸಿನೆಮಾವಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ . ಜಾಕ್ ಮಂಜು ನಿರ್ಮಾಣದ ಈ ವಿಕ್ರಾಂತ್ ರೋಣ ಹೆಸರಲ್ಲೇ ಒಂದು ಪವರ್ ಇದೆ. ಅಜನೀಶ್ ಲೋಕನಾಥ್ ಮ್ಯೂಸಿಕ್ ಸಿನೆಮಾದ ಮತ್ತೊಂದು ಹೈಲೆಟ್ಸ್. ಆಶಿಕ್ ಸಂಕಲನ, ವಿಲಿಯಮ್ ಡೇವಿಡ್ ಛಾಯಾಗ್ರಹಣ ಚಿತ್ರಕ್ಕಿದೆ.

ಜಾಕ್ ಮಂಜು ಜೊತೆ ನಿರ್ಮಾಣದಲ್ಲಿ ಅಲಂಕಾರ್ ಪಾಂಡ್ಯನ್ ಕೈ ಜೋಡಿಸಿದ್ದು, ಅಭಿನಯ ಚಕ್ರವರ್ತಿ ಜೊತೆ ಇನ್ನುಳಿದಂತೆ ತಾರಾಂಗಣದಲ್ಲಿ ಅನೂಪ್ ಬಂಡಾರಿ, ನೀತಾ ಅಶೋಕ್ ಅಭಿನಯಿಸಿದ್ದಾರೆ. ಸುದೀಪ್ ಅವರಿಗೆ ನಾಯಕಿಯಾಗಿ ಯಾರು ಅಭಿನಯಿಸುತ್ತಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ.