ಸೇವಂತಿ 100ರ ಸಂಚಿಕೆಯ ಸಂಭ್ರಮದಲ್ಲಿ “ಸೇವಂತಿ ಜೊತೆ ಶೃತಿ ಸೇರಿದಾಗ”

ಚಲನಚಿತ್ರ ನಟಿ ಶೃತಿಯವರನ್ನು ಕಿರುತೆರೆಯಲ್ಲಿ ಕಾಣುವ ಅವಕಾಶವನ್ನು ಉದಯ ಟಿವಿ ಒದಗಿಸುತ್ತಿದೆ. ಸರೆಗಮಾ ಇಂಡಿಯಾ ಲಿಮಿಟೆಡ್ ನಿರ್ಮಾಣ ದಲ್ಲಿ, ಶ್ರೀನಿವಾಸ್ ಶಿಡ್ಲಘಟ್ಟ ನಿರ್ದೇಶನದಲ್ಲಿ ಪ್ರತಿದಿನ ರಾತ್ರಿ 7.30ಕ್ಕೆ ಉದಯಟಿವಿ ಯಲ್ಲಿ ಮೂಡಿಬರುತ್ತಿರುವ ಸೇವಂತಿ ಧಾರಾವಾಹಿಯಲ್ಲಿ ವಿಶೇಷ ಅತಿಥಿ ಕಲಾವಿದೆಯಾಗಿ ಭಾಗವಹಿಸುತ್ತಿರುವ ಶೃತಿ ಯವರು, ಇದೇ ಮೊದಲಬಾರಿಗೆ ಕಿರುತೆರೆಯಲ್ಲಿ ಬಣ್ಣ ಹಚ್ಚಿಕೊಳ್ಳುತ್ತಿದ್ದಾರೆ.

ಸೇವಂತಿ ಧಾರಾವಾಹಿ ಇದೀಗ ನೂರನೇ ಸಂಚಿಕೆಯ ಹೊಸ್ತಿಲಲ್ಲಿದ್ದು, ವೀಕ್ಷಕರ ಮನಗೆಲ್ಲುತ್ತಾ ಸಾಗಿದೆ. ಮೋಸಕ್ಕೆ ಒಳಗಾಗಿ ಜೈಲು ಸೇರಿರುವ ಸಾಕು ತಂದೆಯನ್ನು ಬಿಡಿಸುವ ಸಲುವಾಗಿ ಸೇವಂತಿ ಒಂದು ವರ್ಷದ ಒಪ್ಪಂದದ ಮೇರೆಗೆ ಲಾಯರ್ ಅರ್ಜುನನನ್ನು ಗುಟ್ಟಾಗಿ ಮದ್ವೆಯಾಗಿರುತ್ತಾಳೆ.

ಸೇವಂತಿಗೆ ಪರಿಚಯ ಇರುವ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ನಟಿ ಶೃತಿ, ಅವಳಿದ್ದ ಆಶ್ರಮಕ್ಕೆ ಹೋದಾಗ ಈ ಎಲ್ಲಾ ವಿಷಯವೂ ತಿಳಿಯುತ್ತದೆ. ಸೇವಂತಿಯನ್ನ ಭೇಟಿಯಾಗಲು ನಟಿ ಶೃತಿ ನೇರವಾಗಿ ಅರ್ಜುನ್ ಮನೆಗೆ ಬರುತ್ತಾರೆ. ಶೃತಿಯ ಆಗಮನ ಮನೆಯವರೆಲ್ಲರಿಗೂ ಖುಷಿ ಕೊಡುತ್ತದೆ. ಅಲ್ಲೆ ಇರುವ ಶೃತಿಗೆ, ಅರ್ಜುನ್ ಸೇವಂತಿಯ ಒಪ್ಪಂದದ ಮದ್ವೆ ಅನ್ನೋದು ಗೊತ್ತಿಲ್ಲದಿದ್ದರೂ ಅವರಿಬ್ಬರ ಒಡನಾಟವನ್ನ ಸೂಕ್ಷ್ಮವಾಗಿ ಗಮನಿಸುತ್ತಾರೆ ಹಾಗೂ ಒಂದು ಮಹತ್ವದ ಕಾರ್ಯವನ್ನ ಮನೆಯವರ ಸಮ್ಮುಖದಲ್ಲೆ ನಡೆಸಿಕೊಡುತ್ತಾರೆ. ಸೇವಂತಿ ಅರ್ಜುನ್ ಪಾಲಿಗೆ ಶೃತಿ ಅವರ ಆಗಮನ ಹೊಸ ತಿರುವು ನೀಡುತ್ತದೆ. ಆ ಮಹತ್ವದ ತಿರುವೇ ಈ ‘ಸೇವಂತಿ’ ಧಾರಾವಾಹಿಯ ವಿಶೇಷ ಸಂಚಿಕೆಯ ಕುತೂಹಲ. ಸೇವಂತಿ ಜೊತೆ ಶೃತಿ ಅವರೂ ಕಾಣಿಸಿಕೊಳ್ಳುತ್ತಿರುವುದು ವೀಕ್ಷಕರಿಗೂ ಹೊಸ ಉತ್ಸಾಹ ತುಂಬಲಿದೆ.

ಸೇವಂತಿ ಜೊತೆ ಶೃತಿ ಸೇರಿದಾಗ ವಿಶೇಷ ಸಂಚಿಕೆ ಸೋಮವಾರದಿಂದ ಶುಕ್ರವಾರ ರಾತ್ರಿ 7:30ಕ್ಕೆ ನಿಮ್ಮ ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತದೆ.