ಸಿಸಿಬಿ ವಶಕ್ಕೆ ಸ್ಯಾಂಡಲ್ವುಡ್ ನಟಿ ಸಂಜನಾ ಗಲ್ರಾನಿ

ಸ್ಯಾಂಡಲ್ ವುಡ್ನಲ್ಲಿ ಇತ್ತೀಚಿಗೆ ಕೇಳಿ ಬರುತ್ತಿರುವ ಸುದ್ದಿ ಡ್ರಗ್ಸ್ ಕೇಸ್. ಈಗ ಈ ಡ್ರಗ್ಸ್ ಕೇಸ್ ಗೆ ಇನ್ನೊಂದು ಟ್ವಿಸ್ಟ್ ಸಿಕ್ಕಿದ್ದು ನಟಿ ರಾಗಿಣಿ ಬಳಿಕ ಸಂಜನಾ ಗಲ್ರಾನಿಯನ್ನು ಸಿಸಿಬಿ‌ ವಶಕ್ಕೆ ಪಡೆದಿದೆ. ಸ್ಯಾಂಡಲ್ ವುಡ್ ಡ್ರಗ್‌ ಮಾಫಿಯಾ ಪ್ರಕರಣ ಸಂಬಂಧ ಸಿಸಿಬಿ ಅಧಿಕಾರಿಗಳು ಇಂದು ಬೆಳ್ಳಂಬೆಳ್ಳಗೆ ನಟಿ ಸಂಜನಾ ಗಲ್ರಾನಿಯವರ ಮನೆಗೆ ದಾಳಿ ನಡೆಸಿದ್ದು, ಅವರ ಮನೆ ಮತ್ತು ಕಾರನ್ನು ಪರಿಶೀಲನೆ ನಡೆಸಿ ಸಂಜನಾ ಮೊಬೈಲ್ ಪೋನನ್ನು ವಶಕ್ಕೆ ಪಡೆದಿದ್ದಾರೆ. ಸಂಜನಾ ಗಲ್ರಾನಿಯನ್ನು‌ ಹೆಚ್ಚಿನ ವಿಚಾರಣೆಗಾಗಿ ಸಿಸಿಬಿ ಕಛೇರಿಗೆ ಕರೆದುಕೊಂಡು ಹೋಗಿದ್ದಾರೆ.

ಇಂದು ಬೆಳಿಗ್ಗೆ ಸಂಜನಾರವರ ಇಂದಿರಾನಗರದಲ್ಲಿರುವ ನಿವಾಸದ ಮೇಲೆ ಇನ್ಸ್‌ಪೆಕ್ಟರ್ ಪುನೀತ್ ನೇತ್ರತ್ವದಲ್ಲಿ ಮೂರು ವಾಹನಗಳಲ್ಲಿ‌ ಬಂದ 10ಕ್ಕೂ ಹೆಚ್ಚು ಅಧಿಕಾರಿಗಳು ದಾಳಿ ನಡೆಸಿ ಶೋಧ ಕಾರ್ಯ ನಡೆಸಿದ್ದಾರೆ. ಸಂಜನಾ ಗಲ್ರಾನಿ ನಿನ್ನೆಯವರೆಗೂ ನಾನು ಯಾವುದರಲ್ಲೂ ಇಲ್ಲ. ಕೆಲವರು ಬೇಕು ಬೇಕು ಅಂತಾನೇ ನನ್ನ ಕಡೆ ಬೆರಳು ಮಾಡಿ ತೋರಿಸುತ್ತಿದ್ದರೆ ಎಂದು ಹೇಳುತ್ತಿದ್ದ ಸಂಜನಾಗೆ ಇಂದು ದೊಡ್ಡ ಶಾಕ್ ಕಾದಿತ್ತು. ಇನ್ನು ವಿಚಾರಣೆ ವೇಳೆ ಏನೆಲ್ಲಾ ಬಾಯಿ ಬಿಡಲಿದ್ದಾರೆ ಎಂದು ಕಾದು ನೋಡಬೇಕಿದೆ.