ಉದಯ ಟಿವಿಯಲ್ಲಿ ಪ್ರಿಮೀಯರ್ ಮೂವ್ಹಿ “ಚರ್ಕವರ್ತಿ” ಇದೇ ಭಾನುವಾರ ಸಂಜೆ 6ಕ್ಕೆ

ಉದಯ ಟಿವಿಯಲ್ಲಿ ಪ್ರಿಮೀಯರ್ ಮೂವ್ಹಿ “ಚರ್ಕವರ್ತಿ”
ಇದೇ ಭಾನುವಾರ ಸಂಜೆ 6ಕ್ಕೆ

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹಾಗೂ ನಾಯಕಿ ದೀಪಾ ಸನ್ನಿಧಿ ಅಭಿನಯದ ಸೂಪರ್ ಹಿಟ್ ಚಲನಚಿತ್ರ ಚಕ್ರವರ್ತಿ ಇದೇ ಭಾನುವಾರ ಸಂಜೆ 6ಕ್ಕೆ ಉದಯ ಟಿವಿಯಲ್ಲಿ ಪ್ರಸಾರವಾಗಲಿದೆ.

Advertisement

2017ರಲ್ಲಿ ಬಿಡುಗಡೆಯಾದ ಚಕ್ರವರ್ತಿ ಚಲನಚಿತ್ರ ಕನ್ನಡ ಸಿನಿಮಾ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿತ್ತು. ಮಾಸ್ ಹಿರೋ ಆಗಿ ದರ್ಶನ್ ತನ್ನ ಅಭಿಮಾನಿಗಳಿಗೆ ರಸದೌತಣ ನೀಡುವಲ್ಲಿ ಯಶಸ್ವಿಯಾಗಿದ್ರು. ನಿರ್ದೇಶಕ ಚಿಂತನ್ ಈ ಚಿತ್ರದಲ್ಲಿ ದರ್ಶನ್‍ಗೆ ನಾಲ್ಕು ರೀತಿಯ ವಿವಿಧ ಪಾತ್ರವನ್ನು ರಚಿಸಿದ್ದು ನಾಯಕನಾಗಿ ದರ್ಶನ್ ಅದ್ಬುತವಾಗಿ ನಟಿಸಿ ಸೈ ಎನಿಸಿಕೊಂಡಿದ್ದು ಈ ಚಿತ್ರದ ವಿಶೇಷ.

ಈ ಚಿತ್ರದಲ್ಲಿ ನಾಯಕನಾಗಿ ದರ್ಶನ್ ಮೊದಲಾರ್ಧದಲ್ಲಿ ಸಾಧುವಾಗಿ ಗಮನ ಸೆಳೆದರೆ ದ್ವಿತಿಯಾರ್ಧದಲ್ಲಿ ಭೂಗತಲೋಕದ ದೊರೆಯಾಗಿ ಅಭಿಮಾನಿಗಳು ಹುಚ್ಚೆದ್ದು ಕುಣಿಯುವಂತೆ ಮಾಡುತ್ತಾರೆ. ನಾಯಕ ದರ್ಶನ್ ಈ ಚಿತ್ರದಲ್ಲಿ ನಿವೃತ್ತ ಸೈನಿಕನ ಮಗನಾಗಿದ್ದು, ಕೆಲಸ ಹುಡುಕಿ ಬೆಂಗಳೂರಿಗೆ ಬರುತ್ತಾನೆ. ಆದರೆ ಬೆಂಗಳೂರಿನಲ್ಲಿ ಅಚಾನಕ್ಕಾಗಿ ನಡೆವ ಕೆಲವು ಘಟನೆಯಿಂದ ನಾಯಕ ನಂತರ ದೊಡ್ಡ ಭೂಗತ ದೊರೆಯಾಗಿ ಬೆಳೆಯುತ್ತಾನೆ. ಇದು ಆತನ ಕುಟುಂಬಕ್ಕೆ ಗೊತ್ತಿರುವುದಿಲ್ಲ. ಆದರೆ ಸತ್ಯಾಂಶ ತಿಳಿದ ನಂತರ ಅವರು ನಾಯಕನನ್ನು ಕುಟುಂಬದಿಂದ ದೂರಮಾಡುತ್ತಾರೆ. ಕೊನೆಗೆ ನಾಯಕಿ ತನ್ನ ಪ್ರಯತ್ನದಿಂದ ನಾಯಕನನ್ನು ಮತ್ತೆ ಕುಟುಂಬಕ್ಕೆ ಹತ್ತಿರಾಗಿಸುತ್ತಾಳ..? ನಾಯಕ ಭೂಗತ ಲೋಕದ ಎಲ್ಲಾ ಡಾನ್‍ಗಳನ್ನು ಹೇಗೆ ಮುಗಿಸುತ್ತಾನೆ ಎಂಬುದು ಈ ಚಿತ್ರದ ತಿರುಳು.

ನಾಯಕನಾಗಿ ನಾಲ್ಕು ವಿಭಿನ್ನ ಶೇಡ್‍ಗಳಲ್ಲಿ ನಟಿಸಿರುವ ದರ್ಶನ ತನ್ನ ಚತುರ ಅಭಿನಯದಿಂದಾಗಿ ಅಭಿಮಾನಿಗಳಿಂದ ಚಪ್ಪಾಳೆ ಗಿಟ್ಟಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ನಾಯಕಿಯಾಗಿ ದೀಪಾ ಸನ್ನಿಧಿ ಗಮನ ಸೆಳೆದರೆ, ಕುಮಾರ್ ಬಂಗಾರಪ್ಪ, ಸೃಜನ್ ಲೋಕೇಶ್ ಸೇರಿದಂತೆ ಚಿತ್ರದ ಉಳಿದ ಪಾತ್ರಗಳು ತಮ್ಮ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದರೆ, ಚಿತ್ರದ ನಿರ್ದೇಶಕ ಎ.ವಿ. ಚಿಂತನ್ ತನ್ನ ಕೆಲಸವನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ. ಇನ್ನೂ ಸಂಗೀತ ನಿರ್ದೇಶಕ ಅರ್ಜುನ್ ಕೈಚಳಕದಲ್ಲಿ ಮೂಡಿಬಂದಿರುವ “ಒಂದು ಮಳೆಬಿಲ್ಲು” ಎಂಬ ಹಾಡು ಚಿತ್ರ ಮುಗಿದ ನಂತರವೂ ಜನರ ನಾಲಗೆಯ ಮೇಲೆ ಹರಿದಾಡುತ್ತಿರುವುದು ಹಾಗೂ ಆಲ್ ಟೈಮ್ ಸೂಪರ್ ಹಿಟ್ ಹಾಡು ಎಂದು ಹೆಸರು ಪಡೆದಿರುವುದು ಈ ಚಿತ್ರದ ಮತ್ತೊಂದು ವಿಶೇಷ.